RSS : Articles / Comments


Sanggama Sesana

20.11, Posted by simple, No Comment

Mungguh ring kakawin Nitisastra VIII.3 sané madan rerama wénten limang paos kawastanin Panca Wida. Limang paos sané kewastanin Panca Wida inggih punika Sang Ametuwaken artosnyané ida sané ngardi i manusa malarapan antuk alaki rabi kanti embas ring jagaté. Sang Mawéh Bhinojana; sané ngicén bhoga ring sang embas. Sang Mangupadyaya; sané mapaica ajah-ajah paindikan urip minakadi guna widya ring jagat sakala. Sang Anyangaskara; sang sané mapaica ajah-ajah kauripan indik suksman kadyatmikan, tur Sang Matulung Urip ri kalaning Bhaya; ida sane ngicénin patulung ri kalaning i raga keni sengkala utawi keni Panca Bhaya.

Unteng tetuek sasuratan puniki jaga ngupeksa paindikan paos pertama sané kawastanin Panca Wida puniki. Paos pertama Sang Ametuwaken suksmannyané inggih punika i rerama minakadi mémé bapa sané ngardi i pianak saha maduluran upacara Pawiwahan. Kaon miwah becik kawéntenan i pianak nénten pasah ring parilaksana i reramé ri kala ngardi i pianak. Ri kala sang laki rabi ngardi pianak tan nganutin sanggama sesana, parilaksana punika sinalih tunggil sané ngawinang i pianak ri wekasnyané metu tan becik parilaksanannyané. Upaminnyané ngamargiang alaki rabi durung genep yusa.

Manut sakadi kakecap ring kakawin Nitisastra V.1; smara wisaya ruang puluhing ayusa. Suksman lengkara kakawin Nitisastra punika waluya pakéling ring para yowanané sami nénten kadadosan ngayurin indik alaki rabi sadurung mayusa langkung ring duang dasa tiban. Taler asapunika yadiastun sampun mayusa duang dasa tiban yéning durung puput utawi tamat masekolah tur durung madué pakaryan sané dados anggén pangupa jiwa taler tan kawenangan ngayunin alaki rabi nuju Grehasta Asrama. Punika mawinan yéning kantun Brahmacari Asrama tan kadadosang ngayunin indik smara wisaya. Ngayunin kémanten tan dados napi malih ngamargiang. Duh...

Ngamargiang sanggama krida (hubungan séks) kadadosan yéning sampun pascat nglaki rabi nganutin pidabdab upacara pawiwahan manut pawarah agama miwah hukum negara lan dresta sané mamargi ring jagaté. Sanggama krida ring sajeroning alaki rabi taler tan kadadosang ring Sanghyang Agama yéning tan nganutin sesana. Punika mawinan umat Hinduné ring Bali wénten pustaka lontar sané kawastanin Sanggama Sesana. Suksmannyané kadadosang ngamargiang sanggama yéning sampun alaki rabi nanging mangdané manut ring sesana anak ngamargiang sanggama sané kapatutang ring Sanghyang Agama.

Manut papineh Mahatma Gandhi, sanggama krida wantah kadadosang ring sang sampun alaki rabi yéning tetujonnyané ngardi pianak. Sanggama krida tan kadadosang yéning tetujonnyané tan ngardi pianak. Manawi papineh Mahatma Gandhi ring Kali Yuga puniki dahat ketil ngamargiang. Manut pitutur Tantrayana silih tunggil ajaran Hindu nyinahang sanggama wisaya (énérgi séks) punika dahat mautama. Sanggama wisaya punika ngawinang wénten pianak ngwetuang prati sentana. Semara wisaya punika taler ngardi seneng sang sané nglaksanayang sanggama krida ri sajeroning alaki rabi punika. Kasenengan masanggama punika ngardi seger wahya dyatmika (sehat lahir batin). Sanggama krida sané ngardi seger punika yéning sanggamané sané nganutin sesana. Yéning tan nganutin sesana ngamargiang sanggama punika ngwetuang lara roga tur dosa papa neraka yadiastun sajeroning alaki rabi.

Ring Bali, pustaka sané ngeninin pitutur Sanggama Sesana minakadi Lontar Smara Krida, Lontar Rsi Sambhina, Lontar Cumbana Sesana, Lontar Smaragama, Lontar Sanggama Sesana miwah sané sios-siosan. Lontar-lontar indik Sanggama Sesana punika ring jaman modéren puniki patut pisan katuréksa tur kapidabdabin malih mangdané alit-alité sané jaga nglanturang kauripané ring jagaté puniki tatas uning ring Sanggama Sesana. Sanggama sesana puniki tan ja indik satua jaruh-jaruh.

Manut tutur Sanggama Sesana piniki i manusa tan dados masaksi ring para déwa. Santukan prabawan Ida Sanghyang Widhi Wasa sané pinih utama kaapti ri kala ngamargiang sanggama inggih punika Ida Betara Semara miwah Déwi Ratih. Suksmannyané ngaptiang ida betara ri kala ngamargiang sanggama ri sajeroning alaki rabi mangda sang kalih tan lali ring kasucian sanggama punika. Mangda sang kalih marasa wénten saksi suci saking ida betara-betari ri kala ngamargiang sanggama. Punika mawinan manut ring lontar indik Sanggama Sesana setata wénten déwa miwah déwinyané yéning wénten patemuaning alaki rabi.

I Ketut Wiana

sumber Bali post

Related Posts by Categories



No Comment